विराटनगर — उपेन्द्र यादव नेतृत्वको जनता समाजवादी पार्टी (जसपा) नेपाल मोरङ जिल्ला समितिले संविधान पुनर्लेखन तथा सङ्घीयता सुदृढीकरणलगायत २८ बुँदे मागसहित बुधबार सरकारलाई ज्ञापनपत्र बुझाएको छ।
जसपा नेपालले न्यायसङ्गत अधिकार र मागहरू सम्बोधन गराउन देशभर चरणबद्ध सङ्घर्षका कार्यक्रम सार्वजनिक गरेको जनाएको छ। सोही क्रममा पहिलो चरणअन्तर्गत मोरङका प्रमुख जिल्ला अधिकारी युवराज कट्टेलमार्फत प्रधानमन्त्री सुशिला कार्कीलाई सम्बोधन गरिएको ज्ञापनपत्र बुझाइएको हो।
ज्ञापनपत्र बुझाउने टोलीमा जसपाका केन्द्रीय कार्यकारिणी समिति सदस्य जयराम यादव, केन्द्रीय सदस्यहरू सदिना खातुन, रञ्जु बर्मा, सुरेश सिंह गनगाई, कोशी प्रदेश समितिका सचिव अनिल ठाकुर, मोरङ अध्यक्ष राजकुमार यादव, उपाध्यक्ष मन्तलाल यादव, मोहम्मद हकमुदिन, सचिव हरिनारायण साहलगायत नेताहरू सहभागी थिए।
पार्टीले सार्वजनिक गरेको चरणबद्ध कार्यक्रमअनुसार मंसिर ११ देखि १५ गतेसम्म सङ्घीय तथा प्रदेश निर्वाचन क्षेत्रहरूमा कोणसभा र जनपरिचालन अभियान सञ्चालन गरिनेछ।
त्यसपछि मंसिर १९ देखि २१ गतेसम्म जिल्ला प्रशासन कार्यालय अगाडि प्ले–कार्ड र ब्यानरसहित शान्तिपूर्ण धर्ना कार्यक्रम आयोजना हुनेछ।
मंसिर २७ देखि पुस ४ गतेसम्म देशका ६८ जिल्लामा जिल्ला स्तरीय विरोधसभा तथा जनसभा हुने जसपा नेपालले जनाएको छ।
यसबाहेक पुस १२ गते विराटनगरमा कोशी प्रदेशस्तरीय विरोधसभा आयोजना गर्ने कार्यक्रम पनि पार्टीले सार्वजनिक गरेको छ।
