विराटनगर — करिब ११ लाख रुपैयाँ बराबरका विभिन्न किसिमका सामान बोकेको एक भारतीय नम्बर प्लेटको ट्याक्टरलाई रानीप्रहरीले भन्सार छली गरेको आशंकामा नियन्त्रणमा लिएको छ। विराटनगर भन्सार कार्यालयबाट जाँचपास भएर निस्किएको भए पनि विशेष सूचनाका आधारमा रनीप्रहरीले ट्याक्टरलाई निगरानी गर्दै विराटनगर–१३ स्थित टेलिकम कार्यालय अगाडिबाट नियन्त्रणमा लिएको हो।

प्रहरी निरीक्षक कविन राईको नेतृत्वमा खटिएको इलाका प्रहरी कार्यालय रानी, विराटनगरको टोलीले बीआर ३८ इ ७४२५ नम्बरको ट्याक्टरसहित चालकलाई नियन्त्रणमा लिएर राजस्व अनुसन्धान कार्यालय, इटहरी पठाएको छ। मोरङ प्रहरीले भन्सार पास गराउँदा देखाइएकोभन्दा बढी मूल्यका सामान लोड गरेको भन्ने जानकारी पाएपछि ट्याक्टरमाथि कारबाही गरेको जनाएको छ।

ट्याक्टरमा तुलसी गोल्ड पोलिस्टन थ्रेड, फिनिस लेदर, लेदर केमिकल, कटोक फेब्रिक्स लगायतका सामग्री थिए। भन्सार कार्यालयमा ती सामानहरूको कुल मूल्य १० लाख ९६ हजार ३७१ रुपैयाँ घोषणा गरिएको थियो।

प्रहरीले ट्याक्टर चालक भारत, बिहार राज्य अररिया जिल्ला जोगबनीका ३८ वर्षीय रोशन यादवलाई नियन्त्रणमा राखेको छ। यस घटनामा भन्सार एजेन्टका सहयोगी अकबर अलीको संलग्नता रहेको आशंका गरिएको भए पनि उनले आफूमाथि लगाइएको आरोप अस्वीकार गरेका छन्।

यता, राजस्व अनुसन्धान कार्यालय इटहरीका सूचना अधिकारी विदुर गौतमले ट्याक्टर र लोड गरिएका सामान खोल्ने प्रक्रिया सुरु भएको बताउँदै विस्तृत अध्ययनपछि मात्र राजस्व छली भएको–नभएको निष्कर्ष आउने जानकारी दिए।