विराटनगर – मोरङको ग्रामथान गाउँपालिका–३ सिद्राहा बाँसबारी चोकमा सञ्चालित जुवा खालमा प्रहरीले बुधबार राति छापा हानी पाँच जनालाई पक्राउ गरेको छ।
विशेष सूचनाका आधारमा जिल्ला प्रहरी कार्यालय मोरङका इन्स्पेक्टर सरोज खनाल र इलाका प्रहरी कार्यालय बेलबारीका इन्स्पेक्टर कृष्णबहादुर खत्री नेतृत्वको संयुक्त टोलीले राति करिब ११:४५ बजे जुवा खेल भइरहेको ठाउँमा छापा मारेको हो।
छापा मार्ने क्रममा प्रहरीले अवरोध सामना गर्नुपरेको पनि बताइएको छ। पक्राउ परेकामध्ये विराटनगर महानगरपालिका–३ का ६७ वर्षीय अरुण गुप्ता, विराटनगर–१ का ५८ वर्षीय विनोद कार्की, ६८ वर्षीय दिनेश कार्की, ४३ वर्षीय विवेक सिंह र पर्सा वीरगन्ज महानगरपालिका–१६ का ४५ वर्षीय प्रदीपकुमार जैसवाल रहेका छन्।
प्रहरीले पक्राउ परेकाको साथबाट १५ थान कौडा, नगद ४८ हजार ५ सय ४० रुपैयाँ र मोबाइल फोनहरू बरामद गरेको छ। साथै, उनीहरूले प्रयोग गरेको बा ०१–०२६ च ६८५३ नम्बरको कार पनि नियन्त्रणमा लिएको प्रहरीले जनाएको छ।
जिल्ला प्रहरी कार्यालय मोरङका प्रमुख एसपी कवित कटवालका अनुसार चाडपर्वको समयमा जुवाजन्य गतिविधि बढ्ने भएकाले प्रहरीले निगरानी कडा पारेको छ। पक्राउ परेकामाथि आवश्यक कानुनी प्रक्रिया अघि बढाइएको उनले जानकारी दिए।
