विराटनगर – विराटनगरस्थित विराट मेडिकल कलेज टिचिङ हस्पिटलका नर्सहरू लगायतका स्वास्थ्यकर्मीहरूले सरकारले तोकेको न्यूनतम तलब नपाएको भन्दै आज बिहानदेखि आन्दोलन सुरु गरेका छन्। आन्दोलनका कारण अस्पतालको नियमित सेवा प्रभावित बनेको छ।
आन्दोलनरत नर्सहरूले सरकारले निर्धारण गरेको दररेटअनुसारको तलब उपलब्ध गराउन अस्पताल प्रशासनलाई दबाब दिएका छन्। उनीहरूले चेतावनी दिँदै भनेका छन्, “सरकारकै निर्देशन अनुसार तलब दिनुपर्छ, अन्यथा आन्दोलनलाई अझ कडा बनाइनेछ।”
अस्पताल प्रशासनले भने आफूपक्षबाट सक्दो प्रयास भइरहेको जनाएको छ। अस्पतालका प्रमुख कार्यकारी डेनिस कार्कीले भने, “हामीले अस्पतालका स्रोत र साधनअनुसार तलब दिँदै आएका छौं। समस्या समाधानका लागि सरकारसँग छलफल गर्न तयार छौं।”
नर्सहरूको आन्दोलनका कारण अस्पतालमा नयाँ बिरामी भर्ना प्रक्रिया रोकिएको छ भने आपतकालीन सेवा सञ्चालनमा पनि कठिनाइ भइरहेको स्रोतले जानकारी दिएको छ।
स्वास्थ्य सेवा प्रभावित हुँदा सर्वसाधारण र बिरामीका आफन्तहरूले गुनासो पोखेका छन्। “हामी उपचारका लागि आएका हौं, तर सेवा नै बन्द हुँदा हैरानी भएको छ,” एक बिरामीका आफन्तले भने।
अस्पताल र स्वास्थ्यकर्मीबीचको यस विवाद समाधानका लागि सरकारको सक्रिय हस्तक्षेप आवश्यक देखिएको छ।
