विराटनगर — कोशी प्रदेशका आर्थिक मामिला तथा योजना मन्त्री राम राना सवार गाडीले एक बालकलाई ठक्कर दिएपछि ललितपुरको हरिसिद्धि सडक केही समय अवरुद्ध भएको छ।
शनिबार बिहान हरिसिद्धि सडकको उकालोमा मन्त्री सवार गाडीले बालकलाई ठक्कर दिँदा घाइते भएका उनलाई तत्कालै उपचारका लागि बी एण्ड बी अस्पताल लगिएको प्रहरीले जनाएको छ। प्रारम्भिक उपचारपछि उनको अवस्था सामान्य रहेको जानकारी दिइएको छ।
दुर्घटनापछि आक्रोशित स्थानीयले सडक अवरुद्ध पारेका थिए। यसले गर्दा एमालेको दोस्रो विधान अधिवेशन स्थल गोदावरी जाने मुख्य सडक केही समयका लागि जाम भएको थियो।
प्रहरीले परिस्थिति नियन्त्रणमा ल्याएर सडक सञ्चालनमा ल्याएको जनाएको छ।
