विराटनगर– मोरङको उर्लाबारीस्थित अरनिको अस्पतालको शौचालयमा आज (शनिबार) बिहान नवजात शिशु फेला परेको छ।
बिहान करिब १०:३० बजे शिशु भेटिएपछि तत्काल उद्धार गरी उपचारका लागि दमकस्थित कियोच बाल अस्पताल लगिएको उर्लाबारी प्रहरीले जनाएको छ।
उद्धारकार्यमा उर्लाबारीस्थित एञ्जल फाउन्डेसन सक्रिय रहेको र फाउन्डेसनले शिशुको प्रारम्भिक अभिभावकत्व ग्रहण गरेको प्रहरी निरीक्षक रञ्जन बरालले जानकारी दिए। उनका अनुसार हाल शिशुको उपचार जारी छ भने घटनाबारे थप अनुसन्धान भइरहेको छ।
