विराटनगर- नेपाल र इजरायलबीच द्विपक्षीय व्यापार, प्रविधि हस्तान्तरण र निजी क्षेत्रको सहकार्य विस्तारका विषयमा विराटनगरमा आज महत्वपूर्ण अन्तरक्रिया सम्पन्न भएको छ। उद्योग संगठन मोरङ र नेपालका लागि इजरायली राजदूत श्मूलिक एरिक वासबीच व्यापार विस्तारका सम्भावनाहरूबारे विस्तृत छलफल भएको हो।
कार्यक्रममा उद्योग संगठन मोरङका अध्यक्ष नन्दकिशोर राठीले इजरायलसँगको सहकार्यले विशेषगरी कृषि, हरितगृह प्रविधि, बाली व्यवस्थापन र कृषि प्रशोधन क्षेत्रहरूमा नेपाललाई दीर्घकालीन लाभ पुग्ने बताए। उनले दीर्घकालीन साझेदारी तथा संयुक्त लगानीका अवसरहरू पहिचान गर्न निजी क्षेत्रलाई सक्रिय भूमिका खेल्नुपर्नेमा जोड दिए।
इजरायली राजदूत वासले नेपालसँगको व्यापारिक सम्बन्धलाई थप मजबुत बनाउने सकारात्मक दृष्टिकोण व्यक्त गर्दै व्यापारिक सहकार्य आर्थिक मात्र नभई सामाजिक रुपान्तरणको माध्यम पनि बन्न सक्ने बताए। उनले नेपाली उत्पादन र सम्भाव्य निर्यात वस्तुबारे थप जानकारी लिन इच्छुक रहेको उल्लेख गरे।
कार्यक्रममा उद्योग संगठनका कोषाध्यक्ष तथा अन्तर्राष्ट्रिय व्यापार प्रवद्र्धन समितिका संयोजक पारस लुनियाले दुई देशबीचको व्यापार सन्तुलन इजरायलतर्फ झुकेको जानकारी दिए। उनका अनुसार नेपालबाट गलैंचा, हस्तकला, छालाजन्य वस्तु निर्यात भइरहे पनि इजरायलबाट औषधि, प्रसारण उपकरण र कृषि सामग्री आयात भइरहेको छ।
लुनियाले ड्रिप सिचाइ, सूचना प्रविधि, कागज उत्पादन, डाइपर निर्माण र वुड फार्मिङजस्ता क्षेत्रमा सहकार्यको सम्भावना औंल्याउँदै कोशी प्रदेशमा पाइलट परियोजना सञ्चालन गर्न प्रस्ताव राखे। साथै, इजरायलमा कार्यरत ४,५०० भन्दा बढी नेपाली केयरगिभरले नेपालको अर्थतन्त्रमा पुर्याइरहेको योगदान उल्लेख गर्दै ‘लर्न एण्ड अर्न’ कार्यक्रमअन्तर्गत प्राविधिक तालिम, पर्यटन र शिक्षा क्षेत्रमा सहकार्य भइरहेकामा सराहना व्यक्त गरे।
उनले लामो समयदेखि बेपत्ता नेपाली नागरिक विपिन जोशीको रिहाइका लागि पहल गर्न राजदूत समक्ष आग्रहसमेत गरे।
अन्य वक्ताहरूले सिधा हवाई कार्गो सेवा सञ्चालन, रोजगारी सिर्जना र कृषि प्रविधिको हस्तान्तरणलाई प्राथमिकता दिनुपर्नेमा जोड दिएका थिए।
यो अन्तरक्रियाले नेपाल–इजरायल सम्बन्धलाई आर्थिक र प्राविधिक सहकार्यतर्फ अझ बलियो बनाउने अपेक्षा गरिएको छ।
