विराटनगर —उखु किसानहरूले सरकारसँगको वार्ताबाट कुनै सहमति नभएको भन्दै आन्दोलन जारी राख्ने भएका छन्। उखु उत्पादक महासंघका अध्यक्ष श्यामबाबु रायले सरकारले किसानको मुख्य माग सम्बोधन नगरेको जनाउँदै आन्दोलन रोक्ने कुनै कारण नरहेको स्पष्ट पारे।
सरकारले ७५ करोड बढी निकासी गर्ने भनेको उसको कुरा हो, तर हामीले मागेको प्रतिक्विन्टल ७० रुपैयाँ अनुदान पूरा नभएसम्म आन्दोलन रोकिन्न अध्यक्ष रायले भने।
सरकारले प्रतिक्विन्टल ३५ रुपैयाँको दरले अनुदान दिने निर्णय गरेकोप्रति किसानहरू असन्तुष्ट छन्। उनीहरूको भनाइमा, अघिल्लो वर्ष पाएको ७० रुपैयाँको अनुदान यस वर्ष पनि कायम रहनुपर्ने हो। अनुदान कटौती गरेर दिइएको रकमप्रति कुनै सहमति नभएको किसानहरूले स्पष्ट पारेका छन्।
सरकारले चार सदस्यीय वार्ता समिति गठन गरे पनि किसानहरूले आफ्ना मागहरू यथावत् राखेका छन्। अध्यक्ष राय भन्छन सरकारले जसलाई वार्तामा पठाए पनि हाम्रो एउटै माग छ । ७० रुपैयाँ प्रतिक्विन्टलको अनुदान कायम रहनुपर्छ।
