विराटनगर — कोशी प्रदेश सरकारले ल्याएको आम सञ्चार विधेयकविरुद्ध आइतबार विराटनगरमा पत्रकारहरूले सांकेतिक विरोध प्रदर्शन गरेका छन्।
नेपाल प्रेस युनियन कोशी प्रदेश समितिको नेतृत्वमा पत्रकारहरूले करिब १ किलोमिटर उल्टो हिँडेर विधेयक अस्वीकार्य रहेको जनाएका छन्। उनीहरूले प्रदेश सरकारलाई तत्काल विधेयक संशोधन गर्न आग्रह गर्दै, पत्रकारमैत्री बनाउन गम्भीर छलफल गर्नुपर्ने माग राखेका छन्।
प्रदर्शनमा सहभागी पत्रकारहरूले उक्त विधेयकले अभिव्यक्ति स्वतन्त्रता र प्रेस स्वतन्त्रतामाथि अंकुश लगाउने प्रावधान रहेको भन्दै कडा आपत्ति जनाए। उनीहरूले लोकतन्त्रमा पत्रकारिताको स्वतन्त्रता र जनताको सूचना पाउने हक कुण्ठित गर्ने कुनै पनि प्रयास अस्वीकार्य हुने चेतावनी पनि दिए।
नेपाल प्रेस युनियन कोशी प्रदेश समितिले आन्दोलनमा सहभागी सबै पत्रकारप्रति आभार व्यक्त गर्दै, प्रेस स्वतन्त्रतामाथि अतिक्रमण हुने खालका सबै प्रावधान हटाइए मात्र विधेयक स्वीकार्य हुने स्पष्ट पारेको छ।
