विराटनगर — प्रमुख प्रतिपक्षी दल नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले भारत र चीनले नेपाललाई बेवास्ता गर्दै लिपुलेक हुँदै सीमापार व्यापार गर्ने सहमति गरेकोप्रति आपत्ति जनाएका छन्।
बिहीबार सामाजिक सञ्जालमार्फत प्रतिक्रिया व्यक्त गर्दै पूर्व परराष्ट्रमन्त्री समेत रहेका श्रेष्ठले नेपालजस्तो छिमेकी मुलुकको सार्वभौमिकता जस्तो संवेदनशील विषयलाई उपेक्षा गर्नु नेपाली जनताको भावनामाथि गम्भीर चोट भएको टिप्पणी गरेका हुन्।
उनले लिम्पियाधुरा, कालापानी र लिपुलेक नेपालको भूमि भएको ऐतिहासिक प्रमाणसहित नेपालले निरन्तर दाबी गर्दै आएको स्मरण गराउँदै भने, “भारतले अझसम्म सहज ढंगले स्वीकार नगरे पनि यसलाई विवादास्पद क्षेत्रका रूपमा मान्दै नेपालसँग वार्ता गर्ने सहमति जनाएको छ।”
श्रेष्ठले सन् २०१५ मा भारतीय प्रधानमन्त्री नरेन्द्र मोदीको चीन भ्रमणका क्रममा लिपुलेकलाई व्यापारिक मार्गका रूपमा सञ्चालन गर्ने निर्णय भएको र त्यसबेला नै नेपालले कूटनीतिक नोटमार्फत आपत्ति जनाइसकेको तथ्य प्रस्तुत गरे। तर पनि अहिले दुवै देशले त्यही गल्ती दोहोर्याएको भन्दै उनले आपत्ति जनाए।
“नेपालको जानकारी, संलग्नता र सहमति बिना लिपुलेकलाई व्यापारिक प्रयोजनका लागि प्रयोग गर्ने निर्णय आपत्तिजनक छ,” श्रेष्ठले भने, “हामी दुवै छिमेकी मित्र राष्ट्रलाई यसलाई सच्याउन आग्रह गर्दछौं।”
उनले प्रधानमन्त्री केपी शर्मा ओलीको आसन्न भारत र चीन भ्रमणका क्रममा यो विषयलाई प्राथमिकताका साथ उठाउनुपर्नेमा पनि जोड दिए।
“भारत र चीनबीचको सम्बन्ध सुदृढ होस् भन्ने हामी चाहन्छौं,” उनले भने, “तर नेपालको सार्वभौमिकता र स्वाभिमानको मूल्यमा त्यस्तो सम्बन्ध हुनु अस्वीकार्य छ।”
