विराटनगर — सुनसरीको भोक्राहा नरसिंह गाउँपालिका–३ मा सोमबार बिहान बस र माइक्रोबस एक आपसमा ठोक्किँदा ३ जनाको मृत्यु भएको छ।
जिल्ला प्रहरी कार्यालय सुनसरीका अनुसार पूर्व–पश्चिम लोकमार्ग अन्तर्गत जमुवा टोलमा काकडभिट्टाबाट दिक्तेलतर्फ जाँदै गरेको मे १ ख १७९९ नम्बरको बस र प्र २९०१९००१ ज ००४७ नम्बरको माइक्रो विङ्गर आपसमा ठोक्किएको हो। दुर्घटनामा मृत्यु हुनेको परिचय खुल्न बाँकी रहेको प्रहरीले जनाएको छ।
दुर्घटनामा १५ भन्दा बढी घाइते भएका छन्। घाइतेहरूलाई उपचारका लागि विराटनगर पठाइएको जिल्ला प्रहरी कार्यालय सुनसरीका प्रवक्ता योगराज खतिवडाले जानकारी दिए।
घटनास्थलमा प्रहरीले आवश्यक अनुसन्धान सुरू गरेको र दुर्घटनाको कारण पहिचानका लागि थप अनुसन्धान जारी रहेको जनाएको छ।
