विराटनगर – केही दिनदेखि सम्पर्कविहीन भएका सिन्धुलीको गोलञ्जोर गाउँपालिका–६, छेत्पाका हायु समुदायका १६ जना सदस्य पोखरामा सुरक्षित अवस्थामा फेला परेका छन्।
जिल्ला प्रहरी कार्यालय सिन्धुलीले सोमबार राति प्रेस विज्ञप्ति जारी गर्दै उनीहरू पोखराको लेकसाइडस्थित होटल जननीमा सुरक्षित रूपमा भेटिएको जानकारी दिएको हो।
प्रहरीका अनुसार, सोमबार बिहान १० बजे उर्मिला हायुसहित १६ जना परिवारका सदस्य हराएको भन्ने जानकारी प्राप्त भएपछि खोजी कार्य सुरु गरिएको थियो। अनुसन्धानका क्रममा उनीहरू शनिबार राति १ बजे गोलञ्जोरस्थित बलेनीबाट मधेश प्रदेश ०४–००१–००८१ नम्बरको इभी भ्यानमार्फत सिन्धुली, हेटौँडा, मुग्लिन हुँदै पोखरा पुगेको पुष्टि भएको छ। भ्यान चलाउने व्यक्ति सिन्धुली तीनपाटन गाउँपालिका–३ निवासी २५ वर्षीय जीवन उर्फ नविन विक रहेको बताइएको छ।
हाल सबै सदस्य पोखरामा सुरक्षित रहेका छन् भने घटनाको थप अनुसन्धान भइरहेको प्रहरीले जनाएको छ।
