विराटनगर– मधेश प्रदेशका हजारौं किसान वर्षा नभएर धान रोप्न नपाई खेत सुक्न दिइरहेका छन्, खाद्य संकटको छाया गहिरिँदै गएको छ। तर प्रधानमन्त्री केपी शर्मा ओली भने समस्याको समाधानका लागि ‘हेलिकोप्टर चढेर’ मधेशको आकासे अवलोकनमा सीमित भएका छन्।
शुक्रबार ओलीले महोत्तरी र बारामा आयोजित औपचारिक कार्यक्रममा सहभागी हुन जाँदै सुक्खाग्रस्त क्षेत्रको हवाई निरीक्षण गरे। यस्तो संकटको घडीमा जमिनमै उत्रेर किसानको पीडा सुन्ने अपेक्षा गरिएको भए पनि प्रधानमन्त्रीको उपस्थितिलाई ‘देखावटी चासो’ भन्दै आलोचना सुरु भएको छ।
यसअघि मन्त्रिपरिषद्ले साउन ७ गते मधेश प्रदेशलाई तीन महिनाको लागि ‘विपद् संकटग्रस्त क्षेत्र’ घोषणा गरे पनि त्यो निर्णय घोषणा बाहेकको ठोस कदममा परिणत हुन सकेको छैन। प्रधानमन्त्रीले कृषिमन्त्री र सम्बन्धित निकायसँग छलफल गरेको भनिए पनि त्यसको परिणाम जनताले अनुभूति गर्न सकेका छैनन्।
प्रधानमन्त्रीको सचिवालयले ओलीले सिँचाइको अभाव, जमिनको अवस्था र कृषकहरूको पीडाबारे जानकारी लिएको दाबी गरे पनि वास्तविक राहत योजना, आर्थिक सहयोग वा संकट व्यवस्थापन कार्यक्रमको घोषणा गरिएको छैन।
स्थानीय किसानहरू भन्छन् – “हाम्रो खेतमा चिरा परेको छ, पेटमा भोको छ। नेताहरू हेलिकोप्टरबाट समस्या हेरिरहेछन्। यस्तो निरीक्षणबाट के निस्कन्छ?”
सुक्खा संकट गम्भीर बन्दै गइरहँदा प्रधानमन्त्रीको हवाई अवलोकनलाई जनस्तरमा ‘मिडिया शो’ को संज्ञा दिइएको छ। विपद् व्यवस्थापनको नाममा देखावटी दौडधुप गर्दै सत्ताको चासो केवल प्रचारसम्म सीमित छ भन्ने धारणा झनै बलियो बनेको छ।
मधेश संकटग्रस्त छ, किसान असहाय छन् – र प्रधानमन्त्री आकासमा। प्रश्न उठ्दैछ: के यस्तो नेतृत्वबाट समस्या समाधान सम्भव छ?
