विराटनगर — समुदायका लागि चिकित्सक संस्था (Doctors for Community) द्वारा यही श्रावण १० गते शनिबार विराटनगरस्थित हिमालयन रोडमा एक दिवसीय निःशुल्क स्वास्थ्य शिविर आयोजना गरिने भएको छ।
संस्थाका अध्यक्ष डिल्ली हरिजनले नेपाल पत्रकार महासंघ, मोरङको सभाहलमा आयोजित पत्रकार सम्मेलनमार्फत उक्त जानकारी गराउँदै शिविरले समुदायमा स्वास्थ्य सेवाको पहुँच विस्तार गर्ने उद्देश्य राखेको बताए।
कार्यक्रम संयोजक संजय कुमार विश्वासका अनुसार, शिविर बिहान १० बजेबाट साँझ ६ बजेसम्म सञ्चालन हुनेछ। शिविरमा दन्त स्वास्थ्य सेवा, सुरक्षित रक्तदान कार्यक्रम तथा विविध विशेषज्ञ सेवाहरू प्रदान गरिनेछ।
शिविरमा वरिष्ठ कन्सल्टेन्ट जनरल तथा ल्याप्रोस्कोपिक सर्जन, वरिष्ठ फिजिसियन (आन्तरिक रोग विशेषज्ञ), वरिष्ठ स्त्री तथा प्रसूति रोग विशेषज्ञ, हाडजोर्नी तथा अन्य रोग विशेषज्ञहरू तथा दन्त चिकित्सकहरूबाट सेवा दिइनेछ। साथै सम्पूर्ण ल्याब परीक्षणहरू समेत निःशुल्क गरिने कार्यक्रम संयोजक विश्वासले जानकारी दिए।
संस्थाले समुदायप्रति उत्तरदायित्व बोध गर्दै देशका विभिन्न भागहरूमा यस्ता स्वास्थ्य शिविर, सचेतना कार्यक्रम तथा रक्तदान जस्ता सामाजिक सेवाका कार्यहरू गर्दै आएको जनाएको छ।
शनिबार हुने शिविरमा सर्वसाधारण नागरिकको सक्रिय सहभागिताका लागि संस्थाले हार्दिक अपील गरेको छ।
