विराटनगर – सशस्त्र प्रहरी बल, नेपालले सुनसरीबाट पेस्तोलसहित एक भारतीय नागरिकलाई नियन्त्रणमा लिएको छ।
सशस्त्रका सह–प्रवक्ता डिएसपी शैलेन्द्र थापाका अनुसार शुक्रबार साँझ सुनसरी गाउँपालिका–३ जमुवा सीमा नाकाबाट ३६ वर्षीय राम थेलन पासवान पक्राउ परेका हुन्। भारत अररिया ग्राम पञ्चायत–४ निवासी पासवान भारतीय नम्बर प्लेटको मोटरसाइकलमा नेपालतर्फ आउँदै गरेका थिए।
उनको साथबाट इटालीमा बनेको एक थान पेस्तोल, तीन राउन्ड गोली, ब्राउन सुगरजस्तो देखिने १०० ग्राम पदार्थ, ७ हजार ५ रुपैयाँ, ९ हजार ३८० भारतीय रुपैयाँ र मोटरसाइकल बरामद गरिएको सशस्त्र प्रहरीले जनाएको छ।
पक्राउ परेका पासवानलाई बरामद सामग्रीसहित आवश्यक कारबाहीका लागि सम्बन्धित निकायमा बुझाइएको छ। निर्वाचनलाई लक्षित गर्दै सीमा नाकामा कडाइ गर्न निर्देशन दिएपछि जाँचलाई तीव्र बनाइएको सशस्त्र प्रहरी बलले जनाएको छ।