विराटनगर – नेपाली कांग्रेसका महामन्त्री गगनकुमार थापाले संविधानलाई सही मार्गमा ल्याउन फागुन २१ गते प्रतिनिधि सभा सदस्य निर्वाचन अपरिहार्य रहेको बताएका छन् । सोमबार राजधानीमा आयोजित एक कार्यक्रममा बोल्दै उनले मुलुकमा निर्वाचन हुने वा नहुने भन्ने विषयमा बढेको अनिश्चय चिर्न तोकिएकै समयमा चुनाव हुनुपर्नेमा जोड दिए ।
महामन्त्री थापाले निर्वाचनको परिणाम आफ्नो पक्षमा अनुकूल वा प्रतिकूल हुने विषय गौण रहेको उल्लेख गर्दै अहिलेको मुख्य प्राथमिकता नयाँ जनादेशसहित सरकार गठन गर्नु भएको बताए । संविधान निर्धारित ट्रयाकभन्दा बाहिर गएको भन्दै निर्वाचनमार्फत नयाँ संसदको जन्म भई विधिसम्मत ढंगले राज्यका काम अघि बढ्ने उनको धारणा थियो ।
उनले समयमै निर्वाचन हुन नसके मुलुक पुनः ठूलो अनिश्चयको भुमरीमा फस्न सक्ने चेतावनी दिँदै लोकतान्त्रिक प्रक्रियाको निरन्तरताका लागि सबै सरोकारवालालाई गम्भीर र जिम्मेवार हुन आग्रह गरे ।