विराटनगर – लागू औषध गाँजा सहित एक जना भारतीय नागरिकलाई प्रहरीले नियन्त्रणमा लिएको छ।
मिति २०८२ साल कात्तिक ५ गते बिहान करिब १ बजेर ३० मिनेट जाँदा विशेष सूचनाको आधारमा कोशी गाउँपालिका–५ स्थितमा प्रहरीले गरेको कारबाहीमा उक्त पक्राउ भएको हो।
प्रहरी चौकी श्रीपुरजब्दी, सुनसरीबाट खटिएको प्रहरी टोलीले प्र १–०२–००३ ह ८७०५ नम्बरको सिटी रिक्सालाई पछ्याउँदै जाँदा सो सवारी वडा कार्यालय नजिक छोडी चालक फरार भएको थियो।
उक्त सवारीसाधनको चेकजाँच गर्दा ४ बोरा गाँजा जस्तो देखिने लागू औषध फेला परेको प्रहरीले जनाएको छ। बरामद पदार्थको तौल १२३ किलो १५ ग्राम रहेको छ।
सो सवारीमा सवार भारतको बिहार राज्य, सुपौल जिल्लाको किसनपुर पंचायत–६ तिरगंजका २० वर्षीय मोहम्मद इम्तियाज मिया लाई प्रहरीले नियन्त्रणमा लिई थप अनुसन्धानका लागि जिल्ला प्रहरी कार्यालय सुनसरीमा ल्याएको छ।
फरार सिटी चालकको पहिचान र खोजतलास कार्य भइरहेको प्रहरीको भनाइ छ।
