विराटनगर – धनतेरशको पूर्वसन्ध्यामा जनकपुरधामको सोनारपट्टीस्थित एक ज्वेलर्स पसलमा प्रहरीले छापा मार्ने क्रममा प्रहरी र व्यवसायीबीच झडप भएको छ। स्थिति तनावपूर्ण बनेपछि प्रहरीले सात राउण्ड हवाई फायर र दुई सेल अश्रुग्यास प्रहार गर्नु परेको जिल्ला प्रहरी कार्यालय धनुषाका निमित्त प्रमुख डिएसपी गणेश बहादुर बमले जानकारी दिएका छन्।
डिएसपी बमका अनुसार अवैध रूपमा चाँदीको कारोबार भइरहेको भन्ने सूचनाका आधारमा राजश्व अनुसन्धान कार्यालय पथलैयासँग समन्वय गरी छापा मारिएको थियो। “पसलको नाम समेत थिएन, भर्खरै खोलेको भनिएको छ। ७ किलो चाँदी बरामद गरिएको छ, जसको बिल बिजक प्रस्तुत गर्न सकिएको थिएन,” बमले भने।
प्रहरीका अनुसार छापा मार्ने क्रममा सुनचाँदी व्यवसायी संघका पदाधिकारीलाई समेत बोलाएर कानुनी प्रक्रिया अघि बढाउने प्रयास भइरहेको बेला सुरेन्द्र भण्डारी नामका व्यक्तिले प्रहरीमाथि हातपात गरेपछि अवस्था बेकाबु भएको हो।
तर व्यवसायीहरूको अर्कै दाबी छ। जनकपुर उद्योग वाणिज्य संघका अध्यक्ष सुरेन्द्र भण्डारीले कुनै छापा मार्ने टोलीको औपचारिक उपस्थिति नरहेको बताउँदै, “राजश्व अनुसन्धानको अनुमति र संघका पदाधिकारीहरूको उपस्थिति विना बल प्रयोग गरेर प्रहरीले चाँदी लैजान खोजेको हो,” भन्दै आपत्ति जनाएका छन्।
उनले प्रहरीमाथि आफूले कुनै आक्रमण नगरेको दाबी गर्दै क्राइम शाखाका सइ मनोज यादवले पछाडिबाट लाठी प्रहार गर्दा आफू घाइते भएको बताए। “धनतेरशको दिन उद्घाटन हुन लागेको नयाँ पसलमा अघिल्लो दिन छापा हानेर आतंक सिर्जना गरिएको छ,” भण्डारीको भनाइ छ।
व्यवसायी ठाकुरले कालीगढकै काम गर्दै आएका थिए र धनतेरशको अवसर पारेर शनिबार ज्वेलर्स उद्घाटन गर्ने तयारीमा थिए। उनले पनि प्रहरीमाथि ‘लुटेरा शैलीमा’ चाँदी लैजाने आरोप लगाएका छन्।
प्रहरीले भने घटनामा आवश्यक कानुनी प्रक्रिया अनुसार नै कारबाही भइरहेको र थप अनुसन्धान राजश्व अनुसन्धान कार्यालयले गर्ने जानकारी दिएको छ।
यस घटनाले स्थानीय व्यवसायीबीच त्रास फैलाएको छ भने संघसंस्थाहरूले दोषी प्रहरी अधिकारीहरूलाई कारबाहीको माग गरेका छन्।
