विराटनगर – विराटनगरमा मंगलबार भड्किएको आन्दोलनका क्रममा देशभर रहेका भाटभटेनी सुपरमार्केटका २८ मध्ये २१ वटा शाखामा गम्भीर क्षति पुगेको छ। भाटभटेनीका प्रवक्ता पानु पौडेलका अनुसार प्रदर्शनकारीहरूले ती शाखाहरूमा चोरी, तोडफोड र आगजनी गरेका हुन्।
पौडेलका अनुसार १२ वटा शाखामा प्रदर्शनकारीहरूले सामान लुटपाट गरेपछि आगजनी समेत गरेका छन्। यस्तै ९ वटा शाखामा तोडफोड र लुटपाट भएको छ। यस्ता घटनाका कारण करोडौँ रुपैयाँ बराबरको क्षति भएको अनुमान गरिएको छ।
देशभर फैलिएका सात शाखामा भने कुनै क्षति नभएको भाटभटेनीले जानकारी दिएको छ। सुरक्षाकर्मीहरू परिचालन भए पनि भीड नियन्त्रण बाहिर गएपछि शाखाहरू लक्षित भएको भाटभटेनीको भनाइ छ।
सुरक्षाको दृष्टिले केही शाखाहरू बन्द गरिएको र प्रभावित क्षेत्रका ग्राहकलाई असुविधा नहोस् भन्नका लागि वैकल्पिक व्यवस्था मिलाइने पौडेलले बताएका छन्।
प्रदर्शनको विस्तृत कारणबारे अनुसन्धान जारी रहे पनि आन्दोलनको प्रभावमा व्यवसायिक प्रतिष्ठानहरू लक्षित हुनु चिन्ताजनक रहेको सरोकारवालाहरूले बताएका छन्।
सरकारले यस्ता घटनाको अनुसन्धान गरी दोषीमाथि कडा कारबाहीको प्रतिबद्धता जनाएको छ।
