विराटनगर – भारतको गुवाहटीमा जारी पाँच खेलको टी–२० सिरिजमा नेपाल ‘ए’ टिम आज आसामविरुद्ध चौथो खेल खेल्दैछ। तीन खेल सम्पन्न भइसकेको सिरिजमा नेपाल २–१ ले अगाडि छ र आजको जितसँगै सिरिज हात पार्ने लक्ष्य लिएको छ।
नेपाल पहिलो खेलमा डकवर्थ–लुइस (डीएल) प्रणालीमार्फत १५ रनले पराजित भएपनि त्यसपछि उत्कृष्ट प्रदर्शन गर्दै लगातार दुई खेल जितेको थियो। दोस्रो खेलमा नेपालले ९६ रनले प्रभावशाली विजय हात पार्दा तेस्रो खेलमा ९ रनले विजयी भएको थियो।
चौथो खेल आइतबार साँझ ५ बजे सुरु हुँदैछ। नेपाल क्रिकेट संघ (क्यान) ले यो खेलसहित सम्पूर्ण श्रृंखला आफ्नै युट्युब च्यानलमार्फत प्रत्यक्ष प्रशारण गर्दै आएको छ।
अनिलकुमार साहको कप्तानीमा रहेको नेपाल ‘ए’ टिममा युवा र अनुभवी खेलाडीको मिश्रण रहेको छ। अदिल आलम, पवन सर्राफ, सन्दीप जोरा, शुभ कंशाकार, ईशान पाण्डे, देव खनाल, विवेककुमार यादव, कमलसिंह ऐरी, बसिर अहमद, आकाश चन्द, सागर ढकाल, अर्जुन घर्तीमगर, तृतराज दास, युवराज खत्री र शेर मल्ल टोलीमा छन्।
सिरिजको पाँचौ र अन्तिम खेल सोमबार हुनेछ। नेपालले आजकै खेलमा जित निकाल्दै अन्तिम खेलअघि नै सिरिज आफ्नो पक्षमा पार्ने उद्देश्य लिएको छ।
