विराटनगर – प्रसूति तथा स्त्रीरोग विशेषज्ञ डा. बालकृष्ण साहद्वारा लिखित गैरआख्यान ‘गर्भको गर्व’ पुस्तकमाथि विराटनगरमा संवाद कार्यक्रम सम्पन्न भएको छ। हाम्रोमत दैनिकको आयोजनामा भएको कार्यक्रममा पुस्तकका विभिन्न आयामबारे विस्तृत छलफल गरियो।
कार्यक्रममा प्रमुख अतिथि पूर्वाञ्चल विश्वविद्यालयका उपकुलपति प्रा.डा. बिजु कुमार थपलियाले पुस्तकलाई अत्यन्तै पठनीय र महत्त्वपूर्ण कृति भन्दै प्रशंसा गरे। साहित्यकार हरि बराल, हरि कट्टेल र दिनेश श्रेष्ठलगायतले पुस्तकले गर्भावस्थामा महिलाले भोग्ने जटिलता र सामाजिक यथार्थलाई सशक्त रूपमा उजागर गरेको टिप्पणी गरे।
लेखक डा. साहले आफ्नो पेसागत अनुभवमा देखेका वास्तविक घटनाहरूलाई नै पुस्तकमा उतारेको जानकारी दिँदै आगामी दिनमा पनि यस्ता कृतिहरू ल्याउने प्रतिबद्धता व्यक्त गरे। कार्यक्रममा हाम्रोमत दैनिकले लेखकलाई सम्मानसमेत गरेको थियो।
साहित्यपोस्टले प्रकाशित गरेको ‘गर्भको गर्व’ मा ९ वटा कथाहरू समावेश छन्, जसमा गर्भावस्था र महिला स्वास्थ्यसम्बन्धी संवेदनशील विषयहरूलाई मार्मिक रूपमा प्रस्तुत गरिएको छ।
