विराटनगर — मोरङको रंगेली नगरपालिका–३ आमतोला नजिक बेतौना–रंगेली हुलाकी सडक खण्डमा आज दिउँसो मोटरसाइकल र साईकल ठोक्किँदा दुई जना घाइते भएका छन्।
प्रदेश १–०२–०४४ प.८३७९ नं.को मोटरसाइकल बेतौनाबाट रंगेली तर्फ आउँदै गर्दा बाटो क्रस गर्दै गरेको साईकललाई ठक्कर दिँदा दुर्घटना भएको हो। दुर्घटनामा रंगेली नगरपालिका–४ का ६५ वर्षीय हरीबहादुर बस्नेत घाइते भएका छन्। उनको टाउको फुटेर चोट लागेको भए पनि अवस्था सामान्य रहेको प्रहरीले जनाएको छ।
त्यस्तै मोटरसाइकल चालक विराटनगर महानगरपालिका–८ का २४ वर्षीय अनमोल सहनी पनि घाइते भएका छन्। उनको बायाँ हातमा चोट लागेको र अवस्था सामान्य रहेको बताइएको छ।
दुवै घाइतेलाई प्रारम्भिक उपचारका लागि रंगेली अस्पताल लगिएको थियो। सामान्य उपचारपछि थप उपचारका लागि उनीहरूलाई विराटनगरस्थित टिचिङ अस्पताल पठाइएको इलाका प्रहरी कार्यालय रंगेलीले जानकारी दिएको छ।
दुर्घटनाबारे जानकारी पाएलगत्तै प्रहरी सहायक निरीक्षक दुलाचन पासवानको कमाण्डमा टोली खटिएको थियो। मोटरसाइकल र साईकल नियन्त्रणमा लिएर हाल इलाका प्रहरी कार्यालय रंगेलीमा राखिएको प्रहरीले जनाएको छ।
