विराटनगर— सामाजिक उत्तरदायित्वलाई प्राथमिकता दिँदै एएलसी ब्याच ०५३ समूहले शनिबार विराटनगर–८ स्थित विराट सेवा आश्रममा रहेका बृद्धबृद्धालाई सामग्री र भोजन सहयोग गरेको छ।
सरस्वती माध्यमिक विद्यालयबाट ०५३ सालमा एसएलसी दिएका युवाहरुको समूहले आयोजना गरेको कार्यक्रममा आश्रममा आश्रित ६५ जना आमा–बुबालाई भोजन गराउनुका साथै आवश्यक सामग्री हस्तान्तरण गरिएको हो।
समूहका संयोजक सुमन अधिकारीका अनुसार मासिक रुपमा संकलन गरिएको रकमबाट ७० थान तन्ना, एक दर्जन काइयो, एक दर्जन नेल कटर र २ वटा ऐना खरिद गरी आश्रमलाई प्रदान गरिएको छ।
अधिकारीले भने, “हाम्रो उद्देश्य केवल भेटघाटमा सीमित नभई सामाजिक उत्तरदायित्व पूरा गर्ने हो। साथीहरुसँग संकलन भएको रकमबाट नै यो सहयोग गर्न पाएका छौं, यसले आश्रमका आमा–बुबालाई सानो भए पनि सहजता मिलोस् भन्ने हाम्रो चाहना हो।”
आश्रमका सञ्चालक जगत अर्यालले सहयोगका लागि समूहलाई धन्यवाद ज्ञापन गर्दै यस्ता गतिविधिले बृद्धबृद्धाको दैनिकीलाई सहज बनाउन महत्वपूर्ण योगदान पुर्याउने विश्वास व्यक्त गरे।
