विराटनगर — सरकारले उखु किसानलाई दिँदै आएको प्रतिक्विन्टल ७० रुपैयाँ अनुदान घटाएर ३५ रुपैयाँमा सीमित गर्ने निर्णय गरेपछि किसान आन्दोलनमा उत्रिएका छन्। आइतबार तराई–मधेसका १३ जिल्लाका किसान काठमाडौंको माइतीघर मण्डलामा विरोध प्रदर्शनसहित कोणसभा गरेका हुन्।
उखु किसान सङ्घर्ष समितिको अगुवाइमा बिहानै मण्डलाको विस्तारित सडक खण्डबाट नयाँबानेश्वरसम्म र्याली गरिएको थियो। त्यसपछि माइतीघरमा भेला भई सरकारले गरेको निर्णय फिर्ता लिन माग गर्दै किसानले नाराबाजी गरेका हुन्।
किसानको मुख्य मागमा उखुको वक्यौता रकम ७० रुपैयाँकै दरले भुक्तानी गर्नुपर्ने, मूल्य निर्धारण गर्दा कृषकलाई सहभागी गराउनुपर्ने, भुक्तानीमा ढिलाइ नगर्नुपर्ने र उखुमा लगाइएको भ्याट खारेज गर्नुपर्ने रहेको छ।
किसानहरूले माग सम्बोधन नभएसम्म आन्दोलनलाई निरन्तरता दिने चेतावनी दिएका छन्। प्रदर्शनमा सर्लाही, महोत्तरी, सिराहा, रौतहट, बारा, सुनसरी, मोरङ, नवलपरासीसहितका जिल्लाबाट किसानको व्यापक सहभागिता रहेको थियो।
