विराटनगर — विवाह भएको एक सातामै श्रीमतीलाई छुरा देखाएर बलात्कार गरेको अभियोगमा धनुषाका एक पुरुषलाई जिल्ला अदालतले दोषी ठहर गर्दै ६ महिना कैद र एक लाख रुपैयाँ क्षतिपूर्तिको सजाय सुनाएको छ।
धनुषा जिल्ला अदालतका न्यायाधीश दिलकुमार बर्देवाको इजलासले पीडितको मञ्जुरीबिना भएको जबरजस्ती करणी पुष्टि गर्दै सो सजाय तोकेको हो। अदालतले गत जेठ १३ गते प्रतिवादीलाई दोषी ठहर गरेको र जेठ ३० गते सजाय निर्धारण गरी बिहीबार पूर्णपाठ सार्वजनिक गरेको हो।
अभियोगपत्रअनुसार २०७९ वैशाख १४ गते सामाजिक परम्पराअनुसार विवाह भएका दम्पतीबीच वैशाख २१ गते घटना भएको थियो। श्रीमान् मदिरा सेवन गरी कोठामा प्रवेश गरी खाना खान अस्वीकार गरेको भन्दै श्रीमतीलाई छुरा देखाई बलात्कार गरेको उल्लेख छ। यस क्रममा पीडित गम्भीर घाइते भई जनकपुरस्थित रामजानकी अस्पतालमा १० दिनसम्म उपचार गराइएकी थिइन् भने थप उपचार भारतको सीतामढीमा गरिएको थियो।
मामलामा पीडित पक्षले मेडिकल रिपोर्ट, अस्पतालका कागजात, चिकित्सक तथा प्रत्यक्षदर्शीहरूको बयानसहित पर्याप्त प्रमाण पेश गरेको अदालतको आदेशमा उल्लेख छ। पूर्णपाठमा भनिएको छ, “पीडित र प्रतिवादीबीच हालसम्म पति–पत्नीको नाता रहेको, वारदातपछि पनि प्रतिवादीसँगै रहेकी, तर सहमति बिना भएको यौन सम्पर्क आपराधिक देखिएकाले प्रतिवादीलाई ६ महिना कैद र एक लाख क्षतिपूर्ति तिर्नुपर्ने ठहर गरिएको छ।”
नेपालमा वैवाहिक बलात्कारलाई कानुनी अपराधका रूपमा व्याख्या गर्ने क्रममा यस प्रकरणलाई महत्वपूर्ण मिसालका रूपमा लिइएको छ। अदालतले दाम्पत्य सम्बन्ध कायम रहेको अवस्थामा समेत सहमति बिना भएको यौन सम्पर्कलाई अपराध मान्दै सजाय तोकेको हो।
