विराटनगर — करिब पाँच लाखभन्दा बढी श्रद्धालुको सहभागिता रहेको विराटनगरको भव्य रथयात्रामा पत्रकार सोनुकुमार दासले देखाएको मानवीय संवेदनशीलता चर्चाको विषय बनेको छ।
समाजिक सञ्जालमा भाइरल भइरहेको भिडियोमा पत्रकार दासले आफ्नो पेशागत दायित्वभन्दा पर गएर ढलेका श्रद्धालुको जीवनरक्षा गरेका दृश्य देखिन्छन्। भीडभाडका कारण कुचिन सक्ने अवस्थामा पुगेका एक श्रद्धालु अचानक बेहोस भएपछि दास अगाडि बढ्दै उनलाई सम्हाली अस्पताल पुर्याएका हुन्। भिडियोमा उनले घाइतेलाई “कुनै समस्या छैन, अस्पताल आइसकेको छ” भन्दै ढाडस दिइरहेको देखिन्छ।
स्थानीय श्रद्धालु र सुरक्षाकर्मीको सहयोगमा गरिएको उक्त उद्धारले हजारौं मानिसलाई भावुक बनाएको छ। दासले न त आफ्नो सुरक्षा सम्झिए, न त पेशागत दायित्व, बरु संकटमा परेका व्यक्तिलाई प्राथमिकता दिँदै मानवताको धर्म निर्वाह गरेका थिए।
यो पहिलो घटना मात्र थिएन। यसअघि पनि भिडमै ढलेका अर्का श्रद्धालुलाई दासले हिन्दु सम्राट सेनाका स्वयम्सेवकसँगै काँधमा बोकी अस्पताल पुर्याएका थिए। तत्काल एम्बुलेन्स नपाएपछि उनीहरू स्वयम घाइतेलाई उठाएर सप्तकोशी अस्पतालसम्म लगेका थिए।
समाज प्रायः पत्रकारलाई प्रश्नकर्ता वा समाचार वाहकका रूपमा मात्र हेर्ने गरेको छ। तर विराटनगरमा देखिएको यस घटनाले पत्रकारिताको अर्को अनुहार – मानवता र संवेदनशीलता – उजागर गरेको छ।
पत्रकार सोनुकुमार दासले रथयात्रामा देखाएका साहस, करुणा र जिम्मेवारीले प्रष्ट पारेको छ – पत्रकारिता केवल कलम र क्यामेरामा सीमित नभई जीवनरक्षकको भूमिकासँग पनि जोडिन सक्छ।
