विराटनगर — आफूलाई नेपाली राष्ट्रिय गान “सयौं थुँगा फूलका हामी एउटै माला नेपाली” का रचनाकार व्याकुल माइला भन्दै ठगी गर्दै हिँडेका एक व्यक्तिलाई प्रहरीले पक्राउ गरेको छ।
पक्राउ पर्नेमा उदयपुरको बेल्टार घर भएका मिलन राई रहेका छन्। राईलाई बिहीबार इटहरी उपमहानगरपालिकाबाट पक्राउ गरिएको हो। उनले व्याकुल माईलाका नाममा प्रकाशित पुस्तकको भुक्तानी लिन इटहरी आएका बेला प्रहरीले नियन्त्रणमा लिएको जनाएको छ।
प्रहरीका अनुसार राई यसअघि पनि नक्कली व्याकुल माइला बनेर ठगी गरेको आरोपमा पक्राउ परेका थिए। तर सर्तसहित रिहा गरिएको थियो।
राईले आफू नै राष्ट्रगानका सक्कली सर्जक भएको दाबी गर्दै राष्ट्रपति कार्यालयमा उजुरी दिएका थिए। करिब सात महिनाअघि उनले सभामुख देवराज घिमिरेलाई भेटेर राज्यले व्याकुल माईलालाई दिँदै आएको मासिक भत्ता आफूले पाउनुपर्ने मागसहित निवेदनसमेत दिएका थिए।
