विराटनगर — विराटनगरस्थित बाल सुधार गृहमा बुधबार प्रहरी र सुधार गृहका बालबालिकाबीच झडप हुँदा एक वरिष्ठ हवलदार घाइते भएका छन्। घाइतेलाई तत्काल कोशी अस्पतालमा उपचारका लागि लगिएको प्रहरीले जनाएको छ।
सुधार गृह प्रमुख गायत्रीप्रसाद ढकालका अनुसार, प्रहरी टोली केही बालबालिकाले सुर्ती सेवन गरेको आशंकामा जाँच गर्न पुगेको थियो। तर, प्रहरीले जाँच सुरु गरेपछि केही बालबालिकाले विरोध जनाए र विवाद झडपमा परिणत भयो।
घटनापछि ठूलो संख्यामा प्रहरी बल परिचालन गरिएको छ। सुरक्षा स्थिति नियन्त्रणमा राख्नका लागि चारवटै सुरक्षा निकायका प्रमुख घटनास्थल पुगेका छन्।
सुधार गृह प्रशासनका अनुसार ५० जनाको क्षमता रहेको गृहमा हाल १२ देखि ३२ वर्ष उमेर समूहका २४९ जना रहेका छन्, जसका कारण व्यवस्थापनमा अत्यधिक चाप परेको छ। प्रशासनले १८ वर्ष नाघेका केही युवाहरूले वातावरण बिगारेको आरोप लगाएको छ।
झडपको क्रममा केही बालबालिका भागेको आशंका गरिए पनि मोरङका प्रमुख जिल्ला अधिकारी इन्द्रदेव यादवले सबै २४९ जना सुधार गृहमै उपस्थित रहेको पुष्टि गरेका छन्।
प्रहरीले घटनाबारे विस्तृत अनुसन्धान सुरु गरेको र आवश्यक कारबाही अघि बढाइने जनाएको छ।
