विराटनगर – सप्तरी जिल्लाको राजगढ गाउँपालिका–२ कमलपुरमा मदिरा तस्करी नियन्त्रण गर्ने क्रममा मंगलबार राति प्रहरीले चलाएको गोली लागेर एक जनाको मृत्यु भएको छ।
मृत्यु हुनेमा सोही स्थानका ३६ वर्षीय लालु यादव रहेका छन्। प्रहरीले दिएको जानकारी अनुसार भारत–नेपाल सीमाक्षेत्र नजिक ठूलो परिमाणमा मदिरा भण्डारण गरी तस्करी भइरहेको सूचना प्राप्त भएपछि प्रहरीले ‘सर्च अपरेसन’ सुरु गरेका थिए।
अपरेसनको क्रममा स्थानीय बासिन्दाले प्रहरीलाई घेरेर ढुङ्गामुढा गर्न थालेपछि आत्मरक्षार्थ प्रहरीले गोली चलाएको जनाइएको छ। त्यस क्रममा यादवको तिघ्रामा गोली लागेको थियो। गम्भीर घाइते यादवलाई उपचारका लागि राजविराजस्थित गजेन्द्रनारायण सिंह अस्पताल लैजाँदै गर्दा बाटोमै मृत्यु भएको प्रहरी स्रोतले जनाएको छ।
सर्च अपरेसनका क्रममा प्रहरीले विभिन्न ब्रान्डका ८० कार्टुन मदिरा बरामद गरेको छ। घटनापछि सिमा क्षेत्रको अवस्था तनावपूर्ण बनेको छ भने थप सुरक्षा सतर्कता अपनाइएको प्रहरीले जनाइएको छ।
यस घटनाबारे विस्तृत अनुसन्धान भइरहेको प्रहरीले जनाएको छ।
