विराटनगर –हुलाकी राजमार्ग अन्तर्गत कटहरी–विराटनगर सडक खण्डको निर्माणमा देखिएको ढिलासुस्ती, लापरबाही र ठेकेदार कम्पनीको मनोमानीविरुद्ध सर्वपक्षीय बैठक सम्पन्न भएको छ। पूर्वमन्त्री अमनलाल मोदी र डिकबहादुर लिम्बूको विशेष पहलमा मोरङका प्रमुख जिल्ला अधिकारीको कार्यालयमा आयोजित उक्त बैठकमा राजनीतिक दलका प्रतिनिधिहरू, स्थानीय जनप्रतिनिधि, पूर्वमाननीय कुलप्रसाद सांम्बा, विजय विश्वास तथा सरोकारवालाहरूको उपस्थिति रहेको थियो।
बैठकमा निर्माण कार्य निर्धारित समयमै सम्पन्न नगरेको ठेकेदार श्रेष्ठ कन्ट्रक्सन प्रा.लि. विरुद्ध कानुनी प्रक्रिया अघि बढाउने निर्णय गरिएको छ। साथै, निर्माण कार्य तत्काल अघि बढाउन दबाब दिने र आवश्यक परेमा वैकल्पिक उपायमार्फत सडक निर्माण सम्पन्न गर्ने सहमति पनि बैठकले गरेको छ।
स्थानीयवासीको लामो समयदेखिको मागलाई सम्बोधन गर्दै जिम्मेवार निकायलाई सक्रिय बनाउने उद्देश्यले यो बैठक आयोजना गरिएको हो। सहभागीहरूले निर्माणमा देखिएको ढिलाइले सर्वसाधारणलाई पर्न गएको असहजताबारे चासो व्यक्त गरेका थिए।
सरकार तथा सम्बन्धित निकायलाई सडक निर्माण कार्यमा तुरुन्त ध्यान दिन आग्रह गर्दै बैठकले सरोकारवालाहरूको निरन्तर अनुगमनका साथ काम अघि बढाउनुपर्नेमा जोड दिएको छ।
