विराटनगर – नेपाल विद्युत प्राधिकरणका दैनिक ज्यालादारी कर्मचारीहरूले सोमबारदेखि कोशी प्रदेश कार्यालयमा धर्ना थालेका छन्। नेपाल विद्युत प्राधिकरण दैनिक ज्यालादारी कर्मचारी संघर्ष समिति, कोशी प्रदेश समितिको नेतृत्वमा सुरु गरिएको धर्ना कार्यक्रम साउन १२ र १३ गते दुई दिनसम्म चल्ने जनाइएको छ।
संघर्ष समितिका अध्यक्ष विनोद गनगाईंका अनुसार, २ वर्षअघि प्राधिकरणको सञ्चालक समितिले गरेको निर्णय कार्यान्वयनको माग गर्दै आन्दोलन सुरु गरिएको हो। सञ्चालक समितिको २०७८ साउन ३१ गते बसेको ९४९औं बैठकले देशभर रहेका दैनिक ज्यालादारी कर्मचारीलाई मासिक ज्यालादारीमा नियुक्ति गर्ने निर्णय गरेको थियो, तर हालसम्म निर्णय कार्यान्वयन नहुँदा कर्मचारीहरु आन्दोलनमा उत्रिन बाध्य भएका हुन्।
सोमबारको धर्नामा संघर्ष समितिका केन्द्रीय उपाध्यक्ष सरिता दाहाल र कोशी प्रदेश अध्यक्ष विनोद गनगाईं नेतृत्वदायी भूमिकामा थिए। उनीहरूले दैनिक ज्यालादारीलाई मासिक रूपमा नियुक्त गरी न्यूनतम २५,७५० रुपैयाँ तलब दिनुपर्ने माग अघि सारेका छन्।
हाल सरकारबाट दैनिक ज्यालामा काम गर्ने कर्मचारीले प्रतिदिन ७३५ रुपैयाँ ज्याला पाउने व्यवस्था छ। तर संघर्ष समितिका अनुसार, यो ज्याला न्यून छ र प्राधिकरणमा कार्यरत अन्य स्थायी कर्मचारीको तलब सुविधासँग तुलना गर्दा ज्यालादारी कर्मचारीहरूले पाउनुपर्ने न्यूनतम सुविधा पनि त्योभन्दा धेरै हुनुपर्ने माग गरिएको छ।
नेपाल विद्युत प्राधिकरणको २०७६ सालको तथ्यांक अनुसार, देशभर २,८१३ जना दैनिक ज्यालादारी कर्मचारी थिए। तर हालसम्म केहीको मृत्यु, केहीको सेवा निवृत्ति तथा विदेश पलायनका कारण यो संख्या घटेको संघर्ष समितिको भनाइ छ।
संघर्ष समितिले चरणबद्ध आन्दोलनका कार्यक्रमहरू अघि बढाउँदै जाने चेतावनीसमेत दिएको छ, यदि उनीहरूको माग सम्बोधन नगरिएमा अझ कडा कदम चालिने उनीहरूको भनाइ छ।
