विराटनगर — जनकपुरधाममा पानीको चरम अभाव विरुद्ध आवाज उठाउँदै जनता समाजवादी पार्टी नेपाल निकट समाजवादी युवा संघका युवाहरुले आइतबार प्रदर्शन गरेका छन्।
प्रदर्शनकारी युवाहरुले घैला, बाल्टिन, जगजस्ता भाँडाकुँडा बोकेर जुलुस निकालेका थिए। उनीहरुले “पानी देउ!” भन्ने नारासहित मधेश प्रदेशका मुख्यमन्त्री सतिश कुमार सिंहविरुद्ध नाराबाजी गरेका छन्। प्रदर्शनका क्रममा उनीहरुले जनजीवन कष्टकर बनाउनेगरी पानीको संकट समाधान गर्न प्रदेश सरकार असफल भएको आरोप पनि लगाए।
युवाहरुको भनाइअनुसार जनकपुरधाम लगायत मधेश प्रदेशका धेरै स्थानहरूमा लामो समयदेखि खानेपानीको अभाव छ, तर सरकार गम्भीर देखिएको छैन। उनीहरुले तत्काल समाधान नभए अझ कडा आन्दोलनमा जाने चेतावनी दिएका छन्।
पानीजस्तो आधारभूत सेवाको सुनिश्चितता राज्यको दायित्व भएको भन्दै प्रदर्शनकारीहरुले सरकारलाई जनताको जीवन र स्वास्थ्यप्रति संवेदनशील हुन आग्रह गरेका छन्।
