विराटनगर – पूर्वराष्ट्रपति विद्यादेवी भण्डारीले अब आफूलाई कुनै पनि पदप्रति लालसा, महत्वकांक्षा वा आशक्ति नरहेको स्पष्ट पार्नुभएको छ।
शुक्रबार काठमाडौंको बानेश्वरस्थित कार्की ब्याङ्क्वेटमा आयोजित पत्रकार सम्मेलनमा बोल्दै भण्डारीले राष्ट्रपतिको सर्वोच्च पद सम्हालेर इतिहासमा आफ्नो नाम अमर बनाइसकेको बताउँदै अब कुनै पनि राजनीतिक वा संवैधानिक पदप्रति आकर्षण नरहेको बताउनुभयो।
“कुनै पदप्रति लालसा, महत्वकांक्षा र आशक्ति छैन,” उहाँले भन्नुभयो, “किनभने मैले राष्ट्रकै सर्वोच्च पदमा पुगेर इतिहासमा आफ्नो नाम दर्ज गरिसकेको छु।”
नेपालकी पहिलो महिला राष्ट्रपति रहेकी भण्डारीको यो अभिव्यक्तिलाई राजनीतिक वृत्तमा गम्भीर रुपमा लिइएको छ। पूर्वराष्ट्रपतिले पदप्रति मोह नरहेको स्पष्ट पार्दै सार्वजनिक जीवनमा आफ्नो भूमिका अब मार्गदर्शक र सल्लाहकारको रूपमा रहने संकेत दिनुभएको बुझिन्छ।
कार्यक्रममा विभिन्न राजनीतिक, सामाजिक तथा सञ्चारकर्मीको उपस्थिति रहेको थियो।
