विराटनगर – नेकपा (माओवादी केन्द्र) का सांसद जनार्दन शर्माले मधेसमा दशकौँदेखि अधुरा रहेका खानेपानी आयोजनाले जलस्रोत अभाव सिर्जना गरेको र यसको असरस्वरूप मरुभूमिकरणको खतरा बढ्दै गएको बताएका छन्।
प्रतिनिधि सभाको शुक्रबारको बैठकमा बोल्दै सांसद शर्माले सरकारलाई मधेसमा खानेपानी, सिँचाइ तथा मल आपूर्तिको तत्काल व्यवस्था गर्न आग्रह गरेका छन्। उनले खासगरी बोरिङ प्रविधिबाट पानी तान्ने किसानहरूको लागि विद्युत महसुल सरकार आफैंले व्यहोर्नुपर्ने माग समेत अघि सारे।
“तीन दशकदेखि सुरु भएका खानेपानी आयोजनाहरू अझै अधुरै छन्,” उनले भने, “यसैको कारण पानीको हाहाकार छ। चुरे क्षेत्रको विनाशले स्थिति झनै जटिल बनाएको छ। वैज्ञानिकहरूले पनि केही वर्षमै मधेस मरुभूमि बन्ने चेतावनी दिइरहेका छन्।”
सांसद शर्माले किसानहरूलाई सिँचाइ र मलको सहज पहुँच सुनिश्चित गर्न सरकारलाई सीमा नाकाबाट मल ल्याउन दिने व्यवस्था गर्न अनुरोध गरे। साथै, चुरे संरक्षणमा गम्भीरतापूर्वक लाग्नुपर्ने उनको जोड थियो।
उनका अनुसार, सरकारले तत्काल ठोस कदम नचाले मधेसको भूगोल र कृषियोजनामा गम्भीर संकट उत्पन्न हुनसक्ने छ।
“मधेस केवल राजनीतिक सवाल होइन, यो जलवायु, वातावरण र खाद्य सुरक्षासँग जोडिएको प्रश्न हो,” उनले निष्कर्ष निकाले।
