विराटनगर — पूर्वराष्ट्रपति विद्यादेवी भण्डारीले शुक्रबार पहिलोपटक सार्वजनिक रुपमा पत्रकार सम्मेलन गर्न लागेकी छन्। उनी दिउँसो ३ बजे बानेश्वरस्थित कार्की बैंक्वेटमा विशेष पत्रकार सम्मेलन गर्ने तयारीमा छिन्।
राष्ट्रपतिमा दुई कार्यकाल पुरा गरेपछि सार्वजनिक जीवनमा कमै देखिएकी भण्डारीले हालै सक्रिय राजनीतिमा फर्किने संकेत दिएकी थिइन्। तर, उनको पूर्वपार्टी नेकपा एमालेले उनलाई पुनः पार्टीमा स्वागत गर्ने संकेत नदिएर उल्टै सदस्यता नै नवीकरण नगर्ने निर्णय लिएको छ।
गत मंगलबार सम्पन्न एमालेको केन्द्रीय कमिटी बैठकले भण्डारीको पार्टी सदस्यता अमान्य घोषणा गर्दै उनी पार्टी राजनीतिमा संलग्न हुन नपाउने निर्णय गरेको थियो। पार्टीको यस निर्णयपछि भण्डारी पहिलोपटक सार्वजनिक रूपमा प्रस्तुत हुन लागेकी हुन्।
उक्त पत्रकार सम्मेलनलाई राजनीतिक वृत्तमा निकै अर्थपूर्ण रूपमा हेरिएको छ। विशेष गरी एमालेसँगको सम्बन्ध टुटेको पुष्टि गर्ने र भावी राजनीतिक योजनाको संकेत दिने अनुमान गरिएको छ।
भण्डारीका निकट स्रोतका अनुसार उनले पत्रकार सम्मेलनमा आफ्नो राजनीतिक यात्राबारे स्पष्ट धारणा सार्वजनिक गर्नेछिन्। यसले नेपालको वर्तमान राजनीतिक समिकरणमा नयाँ तरंग ल्याउने सम्भावना रहेको विश्लेषण गरिँदैछ।
अब भण्डारीको नयाँ कदम कता मोडिन्छ भन्ने प्रतीक्षामा सबैको ध्यान केन्द्रित भएको छ।
